O PSOE de Rianxo, a través do seu voceiro Óscar Rial, emitiu un comunicado no que mostra a súa postura sobre a Ordenanza de Convivencia. No escrito o grupo recoñece que considera “necesario” abrir “un debate serio sobre a convivencia cidadá” e “dotar ao Concello de ferramentas útiles para responder a determinadas problemáticas que existen no espazo público”. Porén, os socialistas consideran que “a proposta presentada polo Goberno de Julián Bustelo nace cunha importante falta de diálogo, participación e rigor técnico”.
Desde o grupo socialista din que a norma impulsouse “practicamente tras o envío dun correo electrónico hai máis de cinco meses, sen mesas de traballo, sen debate político real e sen un proceso participado coa cidadanía, asociacións ou colectivos afectados”. Sinalan tamén que debera haber máis diálogo aberto coas veciñas e veciños: “A participación non pode quedar reducida a un trámite administrativo”.
Os socialistas consideran ademais que “o texto presenta eivas técnicas e xurídicas, incluíndo contradicións internas, erros impropios dun documento normativo, posíbeis solapamentos con outras ordenanzas municipais e un enfoque excesivamente centrado na sanción”. E engaden: “Botamos en falta medidas de prevención, pedagoxía, educación cívica e traballo comunitario. A convivencia non se mellora só a golpe de multas”, explican desde o PSOE, advertindo de que “unha ordenanza sen esa parte social pode acabar xerando entre a veciñanza unha percepción meramente recadatoria”.
Os socialistas tamén consideran “preocupante” a escasa reacción doutras formacións políticas ante unha proposta que presenta tantas dúbidas técnicas e que afecta directamente aos veciños e veciñas. “A oposición debe exercer unha función útil, crítica e responsábel durante todo o mandato, especialmente cando están en xogo cuestións tan sensíbeis para a cidadanía”, apuntan.
