O Concello de Ribeira celebrou a consecución da Bandeira Azul para a praia de Coroso, logo de que a Goberno local decidiuse este ano concorrer a esta distinción que outorga a Asociación de Educación Ambiental e do Consumidor (ADEAC) como garantía de calidade das augas, xestión ambiental e servizos para as persoas usuarias dos espazos marítimos. “Coroso pasa así a formar parte das 118 praias galegas recoñecidas”, salientaron dende o Consistorio.
Neste senso, a alcaldesa, María Sampedro, manifestou que “cumprimos co noso compromiso de traballar para o reforzo dos atributos deste areal urbano para conseguir esta distinción e, en consecuencia, para o desfrute de bañistas e persoas que practican deporte na contorna. Optamos por potenciar tódalas calidades das que goza esta praia, un dos recursos turísticos naturais por excelencia de Ribeira”.
A rexedora lembrou que o municipio ribeirense tamén obtivo a finais do ano pasado, por cuarta vez consecutiva, a Bandeira Verde de Galicia que concede a Consellería de Medio Ambiente e Cambio Climático polas boas prácticas ambientais e de protección e conservación da paisaxe; “un galardón que tamén ondea no paseo marítimo da referida praia”, recordou, apuntando que este recoñecemento fundamentouse en dez proxectos que versan sobre a ordenación do territorio; a protección do medio ambiente e da paisaxe; o cambio climático e a eficiencia enerxética; a xestión responsábel dos residuos; e accións de sensibilización e comunicación.
