A Xunta de Goberno Local do Concello de Boiro deu luz verde á licitación das obras para a mellora da eficiencia enerxética no Centro Social de Cures, unha actuación dun importe de 155.765,08 euros que conta co financiamento da Deputación da Coruña mediante o Plan de Obras e Servizos (POS+ Concellos).
As actuacións que se proxectan son o cambio de carpinterías para mellorar a eficiencia enerxética; así como o cambio da cuberta de fibrocemento existente por un illamento sobre forxado horizontal para a mellora da envolvente e falso teito con illamento. Vaise a levar a cabo a instalación dun sistema de ventilación con recuperador de calor e a substitución de luminarias a LED.
Ademais proxéctanse actuacións para a impermeabilización da fachada e outras actuacións interiores como o cambio de carpinterías ou o pintado de todas as estancias.
O proxecto publicarase nos vindeiros días na Plataforma de Contratos do Sector Público para que as empresas interesadas poidan presentar as súas ofertas.
