O pasado venres 15 de maio os exteriores do CEIP O Grupo de Ribeira convertéronse nunha gran festa da cultura coa celebración do Día das Letras Galegas impulsada pola ANPA Santa Uxía.
As actividades celebráronse durante toda a tarde e o serán, de 17.00 a 21.00 horas e incluíron inchábeis, animación musical, xogos populares interxeracionais, obradoiros de globoflexia, debuxo e chapas personalizadas (unha exitosa actividade que conseguiu esgotar existencias: 200 unidades) e unha merenda con rosca, zumes e biscoito.
A parte musical veu da man do artista Pakolas, referente do rock en galego para a rapazada, que se implicou co espectáculo Ramona Orbita.
A actividade foi de balde para todos os socios da ANPA e participaron preto de 500 persoas ao longo da tarde entre nenos e as súas familias.
A importante afluencia de nenos e maiores, demostrou, en palabras da organización, “que esta primeira convocatoria da celebración cultural e lúdica resultou un éxito”, polo que dende a ANPA Santa Uxía xa anunciaron que tentarán darlle continuidade todos os anos.
A organización que correu a cargo da ANPA contou coa colaboración da Deputación da Coruña a través da súa liña de subvencións anuais así como do colexio que prestou as instalacións.
Na foto membros da directiva (de esquerda a dereita): Noelia, Sabela, Angel, o presidente, Unai González, o artista Pakolas, Yavanna, María José, Luis e Isabel, encargáronse da organización xunto ao monitorado contratado.
A ANPA anunciou ademais que en breve celebrará unha xornada ambiental en xuño e máis a Festa Fin de Curso, actos nos que se despedirá a actual directiva xa que o venres 29 de maio ás 19 h, no colexio será a asemblea extraordinaria onde se escollerá novo equipo responsábel da asociación ao haber unha única candidatura encabezada por Sabela Cuñarro Fiel.
