O deputado do BNG no Congreso, Néstor Rego, informou este 25 de dun importante principio de acordo co grupo socialista para tramitar definitivamente a lei de transferencia a Galiza da AP-9.
Explicou que se fará por medio “dunha emenda transaccional” que respecta “fundamentalmente” as propostas do parlamento da Galiza.
“Implica a transferencia da titularidade da AP-9 á Administración galega e tamén a salvagarda de que o Estado asume todas as consecuencias, mesmo económicas, das decisións que ten adoptado en relación á Autoestrada do Atlántico para salvagardar, por exemplo, unha hipotética finalización da concesión como consecuencia do expediente aberto pola Comisión Europea pola irregularidade das prórrogas realizadas”.
Deste xeito, sinalou, “dende o BNG poñemos fin ao bloqueo á tramitación da lei de transferencia da AP-9 do Parlamento galego para que se cumpra a vontade unánime da Cámara e da sociedade galega”.
Para o BNG este é “un paso moi importante que implica que se transfire a titularidade, que se transfiren todas as competencias e que se concretará nunha Comisión Mixta Goberno-Xunta da Galiza e a posterior publicación dun real decreto como é habitual en calquera proceso sobre traspaso de titularidade ou de competencias”.
Pola súa banda, o secretario xeral do PSdeG, José Ramón Gómez Besteiro, salientou o acordo dende Ferrol, nun xantar con xornalistas e dixo que o pacto materializarase este martes 26 de maio no Congreso. O acordo, dixo, permitirá transferir a titularidade da autoestrada á Comunidade Autónoma, así como as competencias sobre o réxime xurídico da concesión e as funcións e servizos. “É un mandato parlamentario que deberá materializarse na Comisión Mixta de Transferencias”, sinalou.
“Cun Goberno socialista, o traspaso é unha realidade”, indicou, e advertiu de que “non se entendería un voto negativo” dos populares. “Bloquealo sería unha gravísima responsabilidade que contradiría todo o que viñeron dicindo sobre o propio traspaso”, engadiu.
Besteiro subliñou que, unha vez asegurada a titularidade, a prioridade segue a ser a gratuidade. “O que nos importa máis é que a AP-9 sexa gratuíta, que non lle custe un euro aos usuarios”, dixo. “O primeiro paso é a transferencia, pero o definitivo é a gratuidade. Non imos baixar a garda, non imos parar ata conseguilo”, concluíu.
