Esta semana proseguiron en Rianxo os encontros veciñais (Encontros co Alcalde) nas parroquias destinados a escoitar as demandas e propostas das e dos residentes nos núcleos, coa participación directa do alcalde Julián Bustelo. A nova xornada de traballo e diálogo celebrouse este martes 19 de maio no Centro Cultural Vicente Vidal de Leiro.
Na sesión o rexedor avanzou varias actuacións que se executarán nas próximas semanas como o asfaltado do núcleo de Abuín, o asfaltado de Rial ou a obra para ampliar as redes de abastecemento e saneamento en Meiquiz e Or.
O alcalde tamén recolleu outras demandas “ás que procuraremos darlles resposta á maior brevidade”, sinalou.
A semana anterior Julián Bustelo reuniuse coa veciñanza do Araño no Centro Cultural da Capela, e tamén coa de Isorna na Escola da Bacariza.
Lembrar que durante os meses de maio e xuño o alcalde e os membros do Goberno percorrerán as parroquias do municipio para informar do traballo que se está facendo, para resolver dúbidas e para recoller as propostas e demandas que os veciños e veciñas queiran propor.
Segundo explicou o alcalde, Julián Bustelo, “no Concello de Rianxo entendemos que esta é unha boa maneira de facer política e para min un pracer ter a oportunidade de celebrar estes encontros para falar do presente e do futuro do noso municipio”.
