O Concello de Boiro recibiu da Xefatura Territorial da Consellaría de Sanidade unha notificación coa clasificación das zonas de baño para a tempada 2026 que cataloga a nove delas cunha cualificación de excelente.
O Concello de Boiro conta con 10 praias catalogadas e nove delas contan con clasificación sanitaria excelente que son Barraña, Barraña- Saltiño, Carragueiros, Ladeira do Chazo, Mañóns, Piñeirón, Portomouro, Retorta e Ribeira Grande.
A praia de Peralto mellora os seus resultados con respecto ao ano pasado e pasa de suficiente a ben logo de que se levaran a cabo, no ano 2022, obras para a corrixir o vertido que durante varios anos impedía o baño.
Estas boas analíticas son o resultado do traballo que nos últimos anos se levou a cabo no servizo de saneamento, facendo revisións continuas dos pozos de bombeo e atallando vertidos que podían chegar a derivar no mar.
