Este domingo 24 de maio celebrouse no porto de Rianxo a botadura oficial da dorna Fasquía, un acto organizado pola Asociación Cultural Setefoghas no que participaron as e os integrantes da entidade, o alcalde rianxeiro, Julián Bustelo, e o artista David Cuence, responsábel do pintado da embarcación.
O acto, celebrado na Rampla Vella de Rianxo ao mediodía, tamén contou coa presenza de veciños e das tripulacións doutras embarcacións tradicionais de Rianxo e a contorna (contouse cunha delegación da Real e Ilustre Confraría da Dorna de Ribeira), así como os e as deportistas do Club de Remo, que alzaron os remos en sinal de respecto e celebración. Tamén houbo música da man de Ten Quirisio dende o barco Santa Cruz de Bluscus. Contouse co apoio da Confraría de Pescadores de Rianxo.
O rexedor Julián Bustelo sinalou que a botadura converteu a xornada do domingo “nun día feliz para o noso patrimonio cultural no que sumamos unha nova embarcación tradicional no noso mar”.
A xornada converteuse nun encontro de celebración da cultura mariñeira e das embarcacións tradicionais galegas. Trala botadura as persoas asistentes puideron gozar dunha navegación pola ría de Arousa a bordo de distintas embarcacións. A festa completouse cunha actuación do grupo musical Ten Quirisio e un momento de peche para os socios con petiscos.
A asociación
Setefoghas é unha asociación cultural de Rianxo comprometida coa recuperación e difusión do patrimonio mariñeiro e cultural galego. Entre as súas actividades destacan “a navegación en embarcacións tradicionais, a promoción da lingua e cultura galegas e a organización de eventos de ámbito local e comarcal”.
