A delegación sonense da Asociación Española Contra o Cancro (AECC) vai organizar este mes de maio dúas importantes actividades no municipio do Porto do Son, co apoio do Concello e coa colaboración da Xunta de Galicia. Trátase dunha charla divulgativa sobre cancro de pel e unha cea solidaria.
Por unha banda, a AECC celebrará este xoves 21 de maio, ás 18.00 horas, unha charla gratuíta para a veciñanza na que se porá o foco nos recursos que poñemos poñer en xogo para previr o cancro, concretamente o cancro de papel. Mostrarase a importancia da protección solar e dos cribados, moi relevantes de cara ao verán que se aproxima (o sol é a principal causa deste tipo de cancro). A xornada será impartida na Casa da Cultura pola experta Iria Villar, técnica de prevención da AECC.
Respecto da outra actividade prevista, será a cea solidaria do 30 de maio. Celebrarase no Restaurante O Trapeiro de Noia a partir das 21.30 horas. O prezo será de 40 euros. Haberá, segundo confirmou a organización (AECC), baile e sorpresas. Recadaranse fondos para a investigación do cancro. As entradas estarán dispoñíbeis en Xoaniña e Floristería Marita.
