Patricia Torrado Queiruga, escritora do Porto do Son, estará este xoves 23 de abril en Ribeira, no Ateneo Valle Inclán (Bar Plaza) para presentar o seu libro Kakba, recentemente distinguido co Premio de Poesía do Concello de Vilalba. A cita dará comezo ás 20.30 horas e contará coa presenza da autora acompañada de Antonio Lijó, secretario do Ateneo Valle-Inclán.
Nakba (Catástrofe en árabe) é o título do novo libro da poeta Patricia Torrado Queiruga, os versos cos que gañou en 2025 o Premio de Poesía de Vilalba e que publica Alvarellos Editora en febreiro de 2026. Nunha edición ilustrada pola artista gazatí Reem M Al-Arqan e que inclúe a tradución dos poemas, dende o galego orixinal, tamén en castelán, inglés (a cargo da propia autora) e ao árabe (neste caso, na versión de Omneia Sadek El-Shahat).
Nakba é un poemario de denuncia, un berro indignado contra o xenocidio dun pobo, o palestino, e a destrución de Gaza a mans do goberno de Israel. A autora pregúntase: “Pode un poema describir a barbarie?, canto tardará en marchar do noso vocabulario o léxico da dor?”.
Son en total 24 poemas distribuídos en catro apartados: Raizame, Escombros, Resistir coa palabra e Réquiem.
Tanto a ilustradora Reem como Nasser Rabad levan vivindo na Franxa de Gaza todo o conflito.
A autora
Patricia Torrado Queiruga, nada en Porto do Son en 1987, é unha escritora, xornalista e museóloga galega, ademais de experta en conservación e restauración do patrimonio e activista cultural.
En 2020 gañou o Certame Manuel Murguía de narracións breves co relato Silencios náufragos. En decembro de 2020 obtivo o primeiro premio no III Certame de Poesía Torre de Caldaloba coa obra Herdar a fala. O ano pasado presentou na Casa da Cultura de Porto de Son o libro Ouveos fractais, acompañada na cita literaria pola arpista Clara Pino, e tamén pola secretaria da Asociación Cultural Barbantia, Milagros Torrado.
