O xurado do LI Certame Literario do Concello de Vilalba decretou como gañadora desta nova edición do concurso a obra Nakba da escritora sonense Patricia Torrado Queiruga. A obra gañadora foi presentada baixo o epígrafe Coma quen lambe a ferida. A poeta e novelista da nosa comarca recibirá un premio de 7.000 euros, ao que se suma a publicación da obra.
O xurado estivo composto por figuras de referencia do ámbito cultural e académico galego: Darío Villanueva, membro da Real Academia Española; Ramón Villares, catedrático de Historia; Xulio Xiz, xornalista; Fidel Fernán, director do Grupo de Radio Principal; Luz Airado, avogada e poeta; e Andrea Fernández Maneiro, poeta e gañadora da edición anterior.
A alcaldesa Marta Rouco destacou “a importancia de manter vivo un certame que forma parte da identidade cultural de Vilalba e que é, ademais, un referente en toda Galicia polo seu prestixio e pola súa aposta decidida pola creación literaria”. Engadiu que “detrás destas cinco décadas de historia hai un compromiso claro co talento, a cultura e a palabra escrita”.
Patricia Torrado Queiruga, nada en Porto do Son en 1987, é unha escritora, xornalista e museóloga galega, ademais de experta en conservación e restauración do patrimonio e activista cultural. En 2020 gañou o Certame Manuel Murguía de narracións breves co relato Silencios náufragos. En decembro de 2020 obtivo o primeiro premio no III Certame de Poesía Torre de Caldaloba coa obra Herdar a fala. O ano pasado presentou na Casa da Cultura de Porto de Son o libro Ouveos fractais, acompañada na cita literaria pola arpista Clara Pino, e tamén pola secretaria da Asociación Cultural Barbantia, Milagros Torrado.
Segundo explicou a autora, Ouveos fractais é un libro adicado “a todas as mulleres sen voz e a todos os que ouvean canda elas”. Trátase dun feixe de poemas directamente encamiñados a loitar contra este silencio e, por extensión, contra as moitas e variadas manifestacións da violencia e da desigualdade.
Participan con ilustracións e fotos Diana Fajardo, Adolfina Mesa, Viki Rivadulla, Emma Pedreira, Andrea F. Maneiro e Paola García.
