Persoas maiores de Rois veñen de vivir unha experiencia inesquecíbel na tradicional viaxe anual organizada polo Concello, que este 2026 tivo como destino a illa de Mallorca.
Do 13 ao 19 de abril, un grupo cheo de enerxía percorreu algúns dos recunchos máis emblemáticos das Baleares.
Durante a estadía, a veciñanza do concello desfrutou dun completo programa de actividades, con visitas guiadas ás Covas do Drach, á cidade de Palma coa súa maxestosa catedral e á fermosa Valldemossa.
Ademais, nunha intensa xornada atravesaron a Serra da Tramuntana para coñecer lugares tan singulares coma o mosteiro de Lluc, Sa Calobra e Sóller. Un día cheo de emocións no que, ademais de en autobús, viaxaron en barco, tranvía e no famoso tren histórico.
Acompañaron o grupo a concelleira de Cultura, Victoria Quiroga, e a técnica de Normalización Lingüística, Inma Seage.
