Persoas voluntarias convocadas por Afundación a través do seu programa de voluntariado Actúa traballarán este sábado 10 de abril no complexo dunar do Parque Natural Corrubedo na retirada de plántulas de piñeiro (Pinus sp.). A actuación deseñouse para tratar de poñerlle freo ao seu avance que, de xeito progresivo, estalle a comer terreo á duna e ás especies propias, favorecendo a extensión do bosque e desacelerando a súa mobilidade natural.
Xunto cos piñeiros, está prevista a retirada doutras especies exóticas invasoras como Conyza sp., a margarida africana Arctotheca calendula e varios pes de áloe.
Esta actividade foi planificada no marco de PLANCTON, o Plan de Conservación Territorial impulsado pola Obra Social de Abanca, a través do cal a entidade desenvolve un labor continuo de protección e posta en valor do patrimonio natural galego. A iniciativa lévase a cabo coa colaboración activa do seu voluntariado, que participa en actuacións distribuídas ao longo de distintos puntos da costa de Galicia.
O principal obxectivo deste programa é “garantir a conservación destes espazos de alto valor ecolóxico e paisaxístico, promovendo accións que contribúan á súa protección e ao mantemento da súa biodiversidade co fin de salvagardar estes enclaves para as xeracións futuras, asegurando que poidan gozar deles nas mesmas condicións nas que son apreciados na actualidade”.
Data e hora
Sábado, 11 de abril
De 10.00 a 14.00 h
Abanca compartiu a localización do punto encontro no Parque Natural.
