O BNG de Boiro convoca á veciñanza de Escarabote a participar nunha xuntanza parroquial aberta que terá lugar o vindeiro mércores 29 de abril, ás 20:00 horas, no Centro Social de Escarabote. A voceira municipal do BNG, Raquel Suárez, anima a todas as veciñas e veciños a achegarse a este encontro co obxectivo de manter unha conversa directa sobre os principais problemas e preocupacións do municipio.
Como é habitual, o BNG desenvolve anualmente unha rolda de xuntanzas parroquiais nas que a cidadanía é a protagonista. Estas reunións permiten recoller de primeira man as inquedanzas da veciñanza e orientar o traballo político cara ás súas necesidades, trasladando as demandas ás institucións municipais para procurar solucións eficaces.
Dende o BNG destacan que a súa acción política está marcada polo contacto directo coa xente, co compromiso de escoitar, atender e dar resposta ás problemáticas locais.
Nesta ocasión, ademais de escoitar á veciñanza, tamén se abordarán cuestións de actualidade como a suba de impostos ou o canon da auga, co fin de aclarar dúbidas e compartir información relevante.
“Traballamos man a man coa veciñanza para mellorar Boiro, porque no BNG a túa voz conta”, afirma Suárez.
O encontro está aberto a toda a cidadanía e pretende ser un espazo de diálogo, participación e construción colectiva.
