A terceira edición do Programa Integrado de Emprego de Ribeira continúa a súa andaina cun novo curso centrado na cociña colectiva coa asistencia dun total de 15 persoas. Durante a impartición do mesmo, nesta semana tiveron ocasión de recibir formación da man de PescadeRías, a cal consistiu
nunha visita polo mercado municipal para coñecer as diferentes especies de peixes e mariscos, etiquetado ou rastrexabilidade, entre outras cuestións; unha sesión na que colaboraron as praceiras e praceiros.
O dito curso de cociña colectiva ensina nocións básicas sobre o traballo en comedores escolares ou catering, cunha duración total de 35 horas e que desenvolve nos luns e martes ata finais de mes.
Segundo manifestou a concelleira de Promoción Económica e Emprego, Carmen Pérez, “recentemente finalizamos o curso de aplicación de fundamentos básicos en cociña e xa toca volver a poñerse aos fogóns co de cociña colectiva. En meses pasados tamén se impartiron o de carretilla, manipulación de alimentos ou hixiene alimentaria. Temos un firme compromiso coa formación como mecanismo para a capacitación e introdución ao mundo laboral”.
Compromiso de inserción laboral do 45%
O Programa Integrado de Emprego de Ribeira conta coa participación dun cento de persoas desempregadas inscritas como demandantes de emprego e residentes nos concellos de Ribeira, A Pobra do Caramiñal, Boiro, Rianxo e Porto do Son, cun compromiso de inserción laboral do 45%.
Ao longo de doce meses reciben orientación, formación e intermediación laboral baseada nunha metodoloxía que combina a parte expositiva coas dinámicas de grupo, buscando adaptarse ás necesidades e utilizando as novas tecnoloxías para favorecer a comunicación e a conciliación, así como o desenvolvemento de habilidades para a busca de emprego.
O Programa Integrado de Emprego 2025-2026 está promovido polo Concello de Ribeira e subvencionado pola Consellería de Emprego, Comercio e Emigración da Xunta de Galicia e o Servizo Público de Emprego Estatal.
