O Concello de Noia, no marco do seu compromiso coa recuperación e difusión da nosa historia democrática, organiza este mes de abril unhas xornadas dedicadas á II República.
As actividades foron presentadas pola concelleira de Memoria Histórica, Chelo Martínez, e o tenente de alcalde, Manolo Seijas, quen destacaron a importancia de manter viva a memoria colectiva e poñer en valor os principios de liberdade, igualdade e xustiza.
Ao longo destes días, veciñanza e visitantes poden participar en propostas culturais e divulgativas que nos achegan á nosa historia recente desde diferentes perspectivas.
Os encontros darán comezo o 11 de abril, coa representación da peza teatral O Mestre, de Xosé Agrelo, nunha adaptación da Asociación Cutural O Xeito (a entrada será de balde, o 11 de abril, ás 20.30 horas no Coliseo Noela).
O 14 de abril presentarase o libro María Vázquez, a mestra socialista eliminada polo franquismo, de Aurora Marco. Será na Casa da Cultura ás 20.30 horas.
As xornadas inclúen tamén unha mesa redonda sobre a II República o 17 de abril ás 20.30 horas no Casino de Noia, moderada por Marta Lois, decana da Facultade de Ciencias Políticas da USC.
Farase tamén unha homenaxe a Maxi Olariaga, baixo o epígrafe Na defensa dos valores republicanos.
