A ULA Libraría Social, na rúa da Capela da Serra de Outes, acolle este venres 24 de abril a presentación do libro Arredor do Sol (Edicións Fervenza), unha contribución literaria de poesía infantil escrita por Mónica Varela Gestoso, escritora e profesora de Vilanova de Arousa. A presentación contará coa súa presenza, e dará comezo ás 19.30 horas.
Trátase dun libro ilustrado a toda cor e encadernado en tapa dura. Achega un mundo de versos que orbitan arredor dos astros, a lúa, o sol e as estrelas e proponnos unha viaxe, á vez interior e exterior, na que sobrevoamos o universo.
O libro déixase ler por un público variado, que vai máis alá da infancia, que conecta coa corrente galega máis nosa, a do hilozoísmo e do paisaxismo ou a estética da paisaxe, e por iso non deixa de ser un chanzo máis, e ben grande, no minguado corpus de poesía infantil para todas as idades.
