O Auditorio de Rianxo acolleu este sábado 18 de abril o encontro FormaTEA 2026, a primeira xornada formativa da Asociación de Trastornos do Espectro Autista do Barbanza (BarbanTEA). A xornada xirou en torno á regulación no autismo e foi conducida pola especialista Anabel Cornago, formadora, activista, nai dun fillo autista e responsábel do blog El sonido de la hierba al crecer.
Cornago convidou aos asistentes a reflexionar sobre a importancia de mirar máis aló as condutas e entender as necesidades e vivencias das persoas autistas, como base para un acompañamento respectuoso e transformador.
Participaron máis de 150 persoas de diferentes puntos de Galicia.
Organizou BarbanTEA en colaboración co Concello de Rianxo e a Universidad Internacional de La Rioja (UNIR).
Foi unha formación práctica, comprensiva e profundamente respectuosa, dirixida a familias, docentes e profesionais, persoas autistas, estudantes e persoas interesadas na neurodiverxencia. A xornada achegou formación ás persoas asistentes nos seguintes puntos: comprensión profunda do funcionamento autista; estratexias sensoriais, emocionais e executivas, ferramentas reais para o día a día e exposición de materiais e talentos autistas.
