O Auditorio de Rianxo acollerá o vindeiro sábado 18 de abril o encontro FormaTEA 2026, a primeira xornada formativa da Asociación de Trastornos do Espectro Autista do Barbanza (BarbanTEA) que foi presentada no Salón de Plenos do Concello de Rianxo. A xornada xirará en torno á regulación no autismo e será conducida pola especialista Anabel Cornago. Participarán máis de 150 persoas de diferentes puntos de Galicia. Dará comezo ás 9.00 horas e rematará ás 20.00 horas, con xantar incluído. Haberá modalidade en liña dispoñíbel.
Organiza BarbanTEA en colaboración co Concello de Rianxo e a Universidad Internacional de La Rioja (UNIR).
Será unha formación práctica, comprensiva e profundamente respectuosa, dirixida a familias, docentes e profesionais, persoas autistas, estudantes e persoas interesadas na neurodiverxencia. A xornada formará ás persoas asistentes nos seguintes puntos: comprensión profunda do funcionamento autista; estratexias sensoriais, emocionais e executivas, ferramentas reais para o día a día e exposición de materiais e talentos autistas.
