Este venres 10 de abril o Centro Social de Abanqueiro vai acoller unha representación teatral a cargo de A Xanela do Maxín: a peza para público infantil O monstro de cores. Será a partir das 20.00 horas, con entradas na billeteira dende unha hora antes da función.
O monstro de cores achéganos unha viaxe chea de cores e emocións. A historia céntrase nun monstro que se espertou confuso, xa que as súas emocións mesturáronse e non sabe como xestionalas. Coa axuda dunha nena curiosa, embarcaranse nunha emocionante aventura para poñer orde no seu interior.
Durante este espectáculo teatral, inspirado no libro de Anna Llenas, exploraranse diferentes sentimentos como a alegría, a tristeza, o medo, a ira e a calma. A través de música, xogos e un despregue de cores, os máis pequenos, a partir de 2 anos, xunto coas súas familias, aprenderán a recoñecer e expresar as súas emocións, entendendo que son compañeiras que requiren atención e comprensión.
