O Concello de Muros continuou estes días avanzando co plan de mantemento das zonas verdes, actuando nesta ocasión na área recreativa de Ventín.
Dende a Concellería de Obras e Servizos, dirixida pola concelleira Laura Rivadeneira, leváronse a cabo nestes días tarefas de roza, limpeza e acondicionamento neste espazo, que inclúe o parque infantil, as pistas polideportivas, as zonas de aparcamento e os accesos á praia. Neste caso, estes traballos foron realizados por empresas externas.
A alcaldesa, María Lago, explica que “o obxectivo destas actuacións é mellorar o estado xeral da área e garantir que a veciñanza e visitantes poidan desfrutar dun entorno coidado, cómodo e seguro, especialmente nestas datas nas que aumenta o seu uso. Ademais, cómpre lembrar que o Pleno da corporación aprobou recentemente un proxecto de substitución do parque infantil, que permitirá renovar por completo as instalacións e dotar este espazo dun novo equipamento”.
Estas intervencións forman parte do traballo continuo que se está a desenvolver en distintos puntos do concello, dando resposta ás necesidades de mantemento tras os meses de inverno.
