A conselleira do Mar, Marta Villaverde, supervisou este luns 2 de marzo os traballos de avaliación e mostraxe que se están a desenvolver no banco marisqueiro Vía Sur e Vía Norte, un dos máis afectados polos recentes temporais que impactaron no litoral galego, e que se enmarcan no Plan de actuación ante eventos de baixa salinidade, estruturado en fases técnicas e obxectivas, deseñado polo Centro de Investigacións Mariñas (CIMA), dependente do departamento que dirixe Villaverde, e actualizado o pasado mes de febreiro.
Trátase, en palabras da Consellería, “dun procedemento rigoroso, contrastado e baseado en datos científicos, de carácter previo, pero que é indispensábel para garantir decisións xustificadas”. Engadiu Villaverde que “os datos recadados permitirán determinar con precisión o grao de afección e adoptar, se fose necesario, medidas específicas de apoio ao sector, como poden ser os ceses de actividade por causa de forza maior, determinar a duración dos peches e fundamentar outras accións, tanto de carácter administrativo como económico no caso de que os informes así o estimen conveniente”.
Os traballos son realizados polas asistencias técnicas da confrarías, en coordinación coa Consellería, empregando para iso a ferramenta tecnolóxica ARouSA. Este sistema determinará os índices de mortalidade severa (maior ou igual ao 50 % do berberecho e/ou ameixa babosa existente), e maior ou igual ao 15 % en ameixa fina ou xaponesa) e moderada (valores inferiores aos anteriores, pero con impacto relevante no banco).
Neste contexto, a directora xeral de Desenvolvemento Pesqueiro, Ángeles V. Suárez, tamén supervisou os traballos de mostraxe que se están a desenvolver no banco marisqueiro de Croa, no ámbito da confraría de Pontedeume. Un labor que se repetiu ao longo desta xornada e nos vindeiros días noutros bancos marisqueiros das provincias da Coruña e Pontevedra, incluíndo zonas das rías de Arousa, Vigo, Pontevedra, Ares, Betanzos, Ferrol e O Burgo.
Este traballo continuado prolongarase durante as próximas semanas co obxectivo de dispoñer dunha visión global, precisa e comparada da afección nos distintos puntos do litoral.
