A Deputación da Coruña celebrará este xoves 26 de marzo en Muros, a segunda xornada técnica da Rede Cultural, centrada na análise e mellora das políticas culturais públicas, cun enfoque específico no papel da mocidade. O encontro, que terá lugar no Auditorio do Centro Cultural e Xuvenil da localidade entre as 16:30 e as 20:30 horas, contará coa participación da deputada de Cultura, Natividade González.
Esta sesión forma parte das xornadas técnicas que a institución provincial promove para favorecer a reflexión colectiva e a mellora continua dun servizo público que chega aos 93 concellos da provincia e mobiliza arredor de dous millóns e medio de euros, abranguendo ámbitos como o musical, escénico, audiovisual ou a dinamización da lingua galega.
Baixo o título A mocidade e as artes, o foro abordará un dos retos actuais da xestión cultural: a conexión coa xente nova e a súa participación activa na vida cultural. A xornada propón repensar os modelos tradicionais de programación para avanzar cara a fórmulas máis participativas, que incorporen a voz da mocidade non só como público senón tamén como axente protagonista na creación e toma de decisións.
Neste sentido, a deputada de Cultura, Natividade González, subliña que estas xornadas “son moito máis que un encontro puntual”, xa que funcionan como espazos de traballo “moi pegados á realidade, cun carácter práctico, pero tamén reflexivo”, orientados a “mellorar a calidade do servizo cultural público que ofrecemos á cidadanía”.
O encontro desenvolverase cun formato participativo e dinámico, conducido por Carlota Mosquera, que simulará un Consello da Mocidade no que estarán representados distintos ámbitos da cultura e do tecido social. Nesta dinámica darase voz a persoas mozas, profesionais da xestión cultural, representantes asociativos e outros axentes implicados, co obxectivo de compartir experiencias, detectar necesidades e formular propostas de mellora.
A iniciativa pretende fortalecer a colaboración entre os distintos sectores que forman parte da Rede Cultural —persoal técnico, compañías e artistas, e públicos—, promovendo unha cultura máis accesíbel, inclusiva e conectada coa realidade social. Ademais, pretende avanzar na creación de espazos de participación estábeis para a mocidade, como posíbeis consellos municipais, que contribúan a canalizar as súas inquedanzas e propostas no ámbito cultural.
