Esta semana arrincou con éxito o Programa Actívate de Noia, iniciativa de actividades saudábeis ao aire libre impulsada polo Concello (Área de Deportes). Arrincou este martes dende Abruñeiras a primeira das andainas saudábeis incluídas no programa, sendo todo un éxito ao xuntar a un nutrido grupo de persoas con ganas de camiñar, compartir e desfrutar do entorno do concello.
Estas andainas, pensadas especialmente para persoas que se están a iniciar ou para persoas maiores, teñen percorridos accesíbeis e doados que non superan os 5 km, favorecendo unha actividade segura e adaptada a todos os niveis. Celebraranse todos os martes, achegando en palabras da organización “unha oportunidade perfecta para saír a camiñar, facer actividade física e compartir un bo rato ao aire libre”.
As inscricións realízanse no Concello de Noia, presencialmente ou chamando ao 981 84 21 00.
A seguinte andaina será a vindeira semana, con saída na porta do Concello ás 10.00 horas.
