O director xeral de Pesca, Acuicultura e Innovación Tecnolóxica, Isaac Rosón, explicou este martes que a autorización para colocar dispositivos de captación de mexilla no polígono de Noia responde a unha tramitación ordinaria, enmarcada na normativa vixente de xestión da acuicultura en Galicia.
Segundo indicou, mentres non existan cambios normativos que modifiquen as tipoloxías de concesión ou o procedemento administrativo, a Administración ten a obriga de cursar calquera solicitude de concesión experimental, con independencia do resultado final da mesma. Neste proceso, subliñou, aplícase un criterio científico-técnico rigoroso que xustifique a necesidade de realizar probas ou experimentos dos que se poidan extraer resultados de relevancia e posible aplicación futura para o sector.
Rosón tamén sinalou que, por deber de confidencialidade e protección de datos, os proxectos de iniciativa privada non poden ser elevados a órganos consultivos cando a normativa non o contempla expresamente. Advertiu de que facelo podería poñer en risco o segredo industrial ou tecnolóxico das persoas promotoras.
Activación da Comisión do Mexillón
No mesmo contexto, o director xeral puxo en valor o papel da Comisión do Mexillón como órgano de “moi alto valor” para a Consellería do Mar. A intención da Xunta é activala, como mínimo, nas catro convocatorias ordinarias anuais previstas, ademais das reunións extraordinarias que sexan necesarias cando respondan a demandas sectoriais ou sexan solicitadas polo número mínimo de integrantes requirido polo seu regulamento.
O obxectivo, segundo explicou, é garantir que os asuntos tratados respondan ao interese xeral do sector e non a peticións individuais. Neste sentido, avanzou que a Comisión será convocada ao longo deste mes para presentar propostas orientadas a mellorar a eficiencia do sistema, unha medida que —afirmou— evidencia “o firme compromiso da Xunta co diálogo sectorial”.
