A Casa da Cultura de Porto do son acollerá o xoves 19 de abril (ás 19:00 horas) o espectáculo Abril, incluído na rede cultural da Deputación da Coruña.
Claudia Abril (voz e percusións) e Marina Carpente (violín e voz) integran este proxecto no que melodías tradicionais galegas e ibéricas son adaptadas a sonoridades actuais con certa intimidade, personalidade e frescura.
Abril é unha proposta de folk contemporáneo na que instrumentos de música tradicional como a pandeireta, o pandeiro ou o violín folk dan lugar a un moi coidado repertorio que contribúe a poñer en valor a música tradicional galega sen deixar de lado a modernidade.
Segundo avanzan dende a Área de Cultura sonense, “Abril é tradición renovada; sons de raíz en harmonía co presente: un microcosmos folclórico no que as identidades converxen e crean comunidade”.
