UCIN Boiro emitiu un comunicado no que denuncia o “estado crítico no que se atopa o Centro Social de Escarabote”, unha situación que é, en palabras da agrupación que dirixe Miguel Piqueras no concello boirense, “consecuencia directa da falta de mantemento e da inacción prolongada do Goberno local”. Din tamén que “a situación é coñecida desde hai anos pola Administración local” e que “as filtracións de auga fixeron que o interior do edificio sexa practicamente inservíbel, con pozas no chan e recipientes repartidos para conter a auga que cae do teito”.
E engaden: “Trátase dunha imaxe impropia dunha instalación pública e indignante para a veciñanza”, unha situación de deterioro que “mesmo obrigou á suspensión de actividades habituais, como os bailes de fin de semana para as persoas maiores, afectando directamente á convivencia e ao benestar social”. UCIN tamén apunta que “a cafetería leva meses pechada pola demora na súa adxudicación, privando ao centro dun servizo esencial”.
O grupo esixe “unha actuación inmediata para reparar as deficiencias estruturais do edificio, eliminar definitivamente as filtracións e axilizar a reapertura da cafetería”. E conclúen: “A veciñanza de Escarabote merece un Centro Social en condicións dignas”.
