O proxecto de unificación dos baixos dos bloques A e B das coñecidas “Vivendas dos Mestres” dá un paso adiante tras o acordo alcanzado en 2024 co grupo de Goberno municipal. A iniciativa, que nace do diálogo político e da insistencia do PSOE de Rianxo, contará cun investimento de 273.000 euros comprometido pola formación socialista.
O plan prevé a creación dun espazo de 200 metros cadrados, dividido en catro locais independentes duns 50 metros cadrados cada un. Estes estarán interconectados por unha pasarela acristalada que facilitará o tránsito pola zona posterior. Ademais, todos os locais disporán de baños adaptados, garantindo a accesibilidade universal e facendo posible o uso do espazo para reunións veciñais, actividades culturais, formativas e asociativas.
“Trátase dunha primeira peza dun modelo de xestión de espazos públicos pensado para as rianxeiras e os rianxeiros, centrado na accesibilidade, na seguridade e na funcionalidade”, destacou a Agrupación Socialista de Rianxo. A formación salientou tamén que este avance “é resultado do traballo constante da oposición, que contribúe a facer realidade unha actuación ao servizo da veciñanza”.
A execución do proxecto terá unha duración aproximada de dez meses. Está previsto que a licitación se resolva nos próximos días, o que permitirá iniciar as obras canto antes e converter este espazo nun novo punto de encontro social para Rianxo.
