Ribeira vive horas de profunda tristeza tras coñecerse o falecemento do profesor Olegario Sampedro López, que morreu este mércores aos 60 anos. A súa perda causou unha gran consternación na comunidade educativa e no conxunto do municipio, onde desenvolveu un intenso labor docente e social durante décadas.
Sampedro foi profesor no IES Número Un de Ribeira e presidía o Instituto de Mediación Educativa de Ribeira (IMER) , entidade de referencia na resolución pacífica de conflitos no ámbito escolar. Licenciado en Filosofía e Ciencias da Educación e en Psicoloxía Infantil e Xuvenil, destacou non só pola súa traxectoria académica, senón tamén pola súa activa implicación en numerosas iniciativas sociais e culturais, o que lle granxeou o respecto e o agarimo de alumnado, compañeiros e veciños.
O instituto no que exerceu como docente acollerá este xoves, ás 11.00 horas, unha homenaxe na súa memoria.
OBITUARIO: “Adeus Gari”. Fernando Sarasqueta
Casado e pai de dúas fillas, a capela ardente quedou instalada na sala 6 do tanatorio Pompas do Barbanza, en Xarás. Os seus restos mortais serán incinerados este xoves ás 23.00 horas no Crematorio do Barbanza. O funeral, coas súas cinzas, celebrarase o venres 27 ás 12.30 horas na igrexa parroquial de Santa Uxía de Ribeira, tras o cal serán inhumadas no cemiterio municipal.
Un proxecto pioneiro con proxección internacional
O 11 de novembro de 2011 constituíase oficialmente o IMER, unha asociación socioeducativa integrada por profesorado de Secundaria co obxectivo de fomentar a convivencia pacífica na comunidade educativa e divulgar a cultura da paz e os dereitos humanos. A día de hoxe, tras intervir na resolución de centos de conflitos, o modelo impulsado desde Ribeira converteuse nun referente internacional, estendéndose a outras comunidades españolas e a varios países europeos.
O xerme do instituto foi o Servizo de Mediación Educativa de Ribeira, un proxecto que implicou a docentes de centros públicos e privados do municipio e que naceu como resultado da tese doutoral de Olegario Sampedro. Dirixida desde a Universidade de Cádiz e a Universidade Complutense de Madrid, a investigación tiña como obxectivo implantar de forma experimental un sistema innovador de mediación escolar, completamente inédito naquel momento tanto a nivel nacional como internacional.
A iniciativa contou ademais co respaldo da Universidade de Valladolid e do Concello de Ribeira, e recibiu diversos recoñecementos autonómicos, nacionais e internacionais. O seu éxito motivou a creación da asociación sen ánimo de lucro que hoxe continúa promovendo a resolución pacífica de conflitos e a Cultura da Paz no ámbito escolar e social.
Compromiso social e recoñecemento educativo
Máis aló do ámbito estritamente académico, Sampedro colaborou activamente con entidades sociais como a Unidade de Asistencia a Drogodependencias de Ribeira e a asociación antidroga Renacer, reafirmando o seu compromiso coa mocidade e os colectivos máis vulnerables.
En 2017, o seu proxecto didáctico Libertas foi seleccionado como finalista autonómico nos Premios Acción Maxistral, convocados pola Fundación FAD, a UNESCO, a Comisión Española de Cooperación e a Fundación BBVA. Aínda que non obtivo o galardón nacional, foi considerado pola comisión avaliadora como un dos traballos máis destacados de Educación Secundaria entre case 400 propostas presentadas en toda España.
Libertas, con promoción do PEN International e PEN Galicia, era un proxecto literario, artístico e didáctico centrado na defensa da liberdade de expresión, inspirado nos casos de escritores e xornalistas a quen se lles vulnerou este dereito. A iniciativa foi seleccionada ademais para representar a Galicia no Programa Bilateral Nortear, celebrado en Guimarães (Portugal).
Coa morte de Olegario Sampedro desaparece unha figura clave na renovación pedagóxica e na promoción de valores humanos desde as aulas de Ribeira. O seu legado, con todo, permanecerá vivo en cada centro educativo que aplica a mediación como ferramenta de convivencia e nas xeracións de alumnos que medraron baixo o seu maxisterio.
