O temporal Nils, que azouta a nosa comarca con ventos de máis de 80 quilómetros por hora, provocou desperfectos de consideración no paseo marítimo de Noia, segundo confirmou o Concello este mércores 11 pola tarde ao tempo que advertiu á veciñanza do risco de acudir á contorna do paseo.
En concreto, os refachos derrubaron parte das varandas de madeira do paseo, cuxos restos caeron á ría. “Pregamos á veciñanza precaución e, ante todo, que non se achegue á pasarela para evitar riscos e garantir a seguridade de todas as persoas”, solicitou o Concello, engadindo que unha patrulla da Policía Local e do GES de Noia procederon ao precintado da zona afectada.
O equipo de goberno municipal xa mantivo unha reunión con Portos de Galicia, entidade propietaria da infraestrutura, solicitando “o arranxo integral do espazo, e volveremos trasladarlle novamente esta situación incidindo na urxencia de actuar e no necesario arranxo desta infraestrutura tan deteriorada”.
