O conselleiro de Educación, Ciencia, Universidades e Formación Profesional, Román Rodríguez, presentou este mércores a oferta pública de emprego docente para 2026, que inclúe 1.601 prazas repartidas en 42 especialidades. A convocatoria abrangue 476 prazas para mestres, 852 para profesores de secundaria e 60 para docentes especialistas en sectores singulares da Formación Profesional (FP).
Segundo detallou Rodríguez, 1.388 prazas serán de novo ingreso, o 86,7% do total, mentres que as 213 restantes destinaranse á promoción interna, para o paso do corpo de mestres ao de profesorado de ensino secundario.
Por corpos, as oposicións de mestre abranguen oito especialidades: Educación Infantil (80), Inglés (45), Francés (35), Educación Física (25), Música (30), Pedagoxía Terapéutica (95), Audición e Linguaxe (41) e Educación Primaria (125). No corpo de profesores de secundaria inclúense 29 especialidades, entre elas Inglés (147), Lingua e Literatura Galega (80), Matemáticas (50), Lingua Castelá e Literatura (35) ou Xeografía e Historia (50). Tamén se convocan 60 prazas en cinco especialidades de FP, como Mantemento de Vehículos (20), Soldadura (14), Cociña e Pastelería (12), Estética (7) e Carpintaría e Moble (7).
O titular de Educación salientou o reforzo nas áreas clave, con especial atención á diversidade, ao convocar 136 prazas nas especialidades de Audición e Linguaxe e Pedagoxía Terapéutica, “un 46% máis ca en 2025”. Tamén destacou o incremento en linguas estranxeiras, con 229 prazas de inglés e 54 de francés entre todos os corpos docentes. Ademais, reforzaranse materias nas que “se estaban esgotando as listas de substitucións”, como Latín (35 prazas) e Soldadura (14).
Rodríguez lembrou que a Consellería “convoca o máximo de prazas posibles por lei, esgotando o 120% da taxa de reposición”, e anunciou que as probas terán lugar en xuño e xullo, co obxectivo de incorporar o novo persoal aos centros o 1 de setembro. Como novidade, os interinos non estarán obrigados a presentarse ás probas, en virtude do acordo cos sindicatos CCOO, ANPE, UXT e CSIF, para “axilizar o proceso”.
A distribución definitiva das prazas analizarase o 10 de febreiro na mesa sectorial de Educación, xunto co decreto de oferta pública de emprego e a orde de convocatoria. Porén, varios sindicatos cuestionaron o procedemento. ANPE advertiu que a reunión “podería quedar reducida a un mero trámite informativo”, mentres que CCOO criticou a “falta de transparencia e diálogo”. CIG-Ensino denunciou que “todo está xa pechado”, e o secretario xeral de UXT Galicia, Cristóbal Medeiros, acusou o conselleiro de reiterar a “práctica habitual” de facer anuncios públicos antes da negociación formal.
