Este xoves 12 de febreiro celebrouse en Noia a primeira sesión da Mesa Interinstitucional do Mar, na que foi analizada polo miúdo a situación da ría e a produtividade marisqueira. O subdelegado do Goberno na Coruña, Julio Abalde, asistiu á constitución do grupo de traballo, celebrada no Edificio Casino do Concello e presidida polo alcalde, Francisco Pérez. A reunión contou coa participación de representantes municipais, da confraría e de diferentes axentes do sector.
Durante o encontro, os asistentes trasladaron a súa preocupación polo estado actual da ría de Noia e pola caída da produtividade marisqueira nas últimas campañas, así como pola elevada mortalidade do berberecho e da ameixa.
Tamén trataron outros factores que, segundo os participantes, estarían a influír na situación da ría, como os episodios de baixa salinidade asociados ás choivas intensas e aos desembalses, as deficiencias estruturais no saneamento e depuración, e a necesidade de reforzar a coordinación institucional.
No transcurso da sesión comentáronse igualmente cuestións vinculadas como a apertura de comportas do encoro do Tambre. Sobre este punto, e ao igual que no relativo á xestión do sector marisqueiro, lembrouse na reunión que “se trata de ámbitos de competencia exclusiva da Xunta de Galicia, administración á que corresponde adoptar as medidas necesarias, incluída a elaboración de estudos e protocolos que permitan analizar e protexer a actividade dos bancos marisqueiros”.
A Mesa Interinstitucional do Mar de Noia acordou, como primeiros pasos, trasladar á Xunta de Galicia unha serie de resolucións centradas na solicitude dun estudo completo sobre o estado real do berberecho e da ameixa, investimentos estruturais na rede de saneamento, a implantación dun protocolo de desembalse, e a adaptación de medidas sociais e administrativas á realidade do sector.
Abalde asistiu á reunión por invitación do Concello e dos axentes participantes, e compartiu a súa preocupación pola situación, comprometéndose a “manter unha reunión co Instituto Social da Mariña para facerlle chegar as demandas formuladas nesta mesa”.
Esta foi, ademais, a primeira visita de Julio Abalde ao Concello de Noia como subdelegado do Goberno na Coruña. Tras a reunión da Mesa Interinstitucional, mantivo un encontro co alcalde no que trataron diferentes asuntos de actualidade municipal.
