A agrupación A Xanela do Maxín, a través do Servizo de Normalización Lingüística do Concello de Outes e con motivo do Día de Rosalía, achegará o espectáculo Dende Rosalía a todo o alumnado do CEIP de Outes este venres, día 27 de febreiro.
A través dunha viaxe imaxinaria guiada pola simpática Pinti, o público emprende un percorrido emocionante pola historia literaria de Galicia da man das súas grandes creadoras.
A obra é unha celebración da lingua galega, da creatividade e da forza das mulleres que a mantiveron viva.
Trátase dun espectáculo dinámico e participativo, que remata en festa e lembra que cada nena e cada neno levan dentro un anaco de Rosalía… e de todas aquelas mulleres que soñaron un mundo máis libre.
Nunha combinación de teatro, poesía, música e pequenas sorpresas escénicas, hologramas e personaxes fantásticos conviven para mostrar que estas mulleres non só fixeron historia, senón que continúan inspirando ás xeracións máis novas.
Ficha técnica
Idades Dende os 3 anos
Duración 40-45 min.
Estrea 22/04/2025 – Oleiros
Elenco artístico Celtia Figueiras ou Xosé Breijo “Topo”
Dirección de escena Xosé Breijo “Topo”
Idioma Galego
Autoría Celtia Figueiras
Gravación e Montaxe vídeo Rafael Iglesias
Produción e distribución A Xanela do Maxín
