O adro da igrexa de Ribeira converteuse este domingo, baixo un sol radiante e ceo completamente azul, nun punto de encontro para veciños e familias que quixeron colaborar coas iniciativas da catequese parroquial.
Arredor de dúas mesas decoradas con globos de cores e caixas chamativas, os nenos e nenas da post-comuñón puxeron en marcha a súa particular “Tómbola da Cate, sempre toca”. Con papeletas numeradas e moita ilusión, recadaban fondos para financiar a súa viaxe a Portugal. Os premios consistían en sobres sorpresa preparados por eles mesmos, con manualidades, pequenas lambetadas e agasallos variados.
Mentres algúns rapaces xogaban ao fútbol nas inmediacións, pais e nais achegábanse para entregar moedas aos seus fillos e probar sorte nas caixas. Entre os premios podía tocar desde un chaveiro ata un dragón impreso en 3D en múltiples cores, acompañado dunha gominola.
Na mesa situada fronte á tómbola estaban os mozos e mozas da confirmación, que reunían participantes de distintas parroquias. Vendían orellas, porcións de tarta de queixo e biscoitos a un euro co obxectivo de sufragar a súa excursión anual a Roma. Se o pasado ano foron 14 os rapaces que realizaron a viaxe, este ano estímase que a cifra podería medrar ata os 50 participantes.
Unha mañá festiva e participativa que demostrou, unha vez máis, o compromiso das familias e da mocidade de Ribeira coas súas actividades parroquiais e co traballo en común para acadar novos proxectos.(Luís Pérez Crujeiras)
