UCIN Boiro emitiu un novo comunicado no que denuncia asolagamentos no núcleo de San, onde os veciños, sinala a agrupación, están a sufrir a entrada de auga n os seus domicilios cada vez que chove, “debido ao desbordamento das tubaxes de recollida de pluviais”.
Miguel Piqueras, coordinador de UCIN Boiro, acompañado de varios compañeiros, visitou a zona e falou directamente cos veciños.
“O que acontece na aldea de San non é un accidente”, sinalou, “é a consecuencia do deixamento e o abandono sistemático do rural. Mentres as familias loitan por salvar as súas casas da auga, o Goberno local dedícase a malgastar máis de 4.000.000 de euros nunha Casa da Cultura que ninguén pediu”, criticou Piqueras.
UCIN Boiro reclamou ao Concello que “convoque os veciños, actúe con urxencia para resolver as inundacións, presente un plan de obras
concreto, con prazos e orzamento definidos para a mellora da rede de pluviais, e aplique medidas provisionais que eviten novos danos mentres non se executan as solucións definitivas”.
