Un total de 13 persoas están a participar estes días no curso de carretilleiro enmarcado na terceira edición do Programa Integrado de Emprego de Ribeira. A acción formativa ten unha duración total de 20 horas, repartidas en catro xornadas: os días 15, 17, 23 e 24 de xaneiro.
A parte teórica do curso impártese no Viveiro de Empresas, mentres que as sesións prácticas desenvólvense os sábados 17 e 24 nas instalacións dunha empresa da comarca, permitindo ás persoas participantes aplicar directamente os coñecementos adquiridos.
Durante as clases trabállase coas diferentes tipoloxías de carretillas elevadoras e o seu manexo, abordando nocións básicas co obxectivo de que o alumnado reúna os requisitos mínimos que demanda o mercado laboral. Trátase dun perfil profesional con alta demanda en sectores como o da alimentación ou a construción.
A concelleira de Promoción Económica e Emprego, Carmen Pérez, visitou o Viveiro de Empresas no primeiro día do curso para coñecer de primeira man o seu desenvolvemento e saudar ás persoas participantes. Segundo explicou a edil, “as accións incluídas no itinerario formativo do Programa Integrado de Emprego buscan capacitar a cidadanía de toda a comarca para distintos perfís profesionais, de aí a variedade dos cursos”. Ademais, sinalou que o obxectivo para o período 2025-2026 é acadar unha inserción laboral do 45%, “para o que a formación resulta indispensable”.
Un cento de persoas participantes no programa
O Programa Integrado de Emprego de Ribeira conta coa participación dun cento de persoas desempregadas, inscritas como demandantes de emprego e residentes nos concellos de Ribeira, A Pobra do Caramiñal, Boiro, Rianxo e Porto do Son.
Ao longo de doce meses, as persoas participantes reciben orientación, formación e intermediación laboral a través dunha metodoloxía que combina sesións expositivas con dinámicas de grupo, adaptándose ás necesidades individuais e empregando as novas tecnoloxías para favorecer a comunicación, a conciliación e o desenvolvemento de habilidades para a busca activa de emprego.
O Programa Integrado de Emprego 2025-2026 está promovido polo Concello de Ribeira e conta co financiamento da Consellería de Emprego, Comercio e Emigración da Xunta de Galicia e do Servizo Público de Emprego Estatal.
