O presidente de Portos de Galicia, José Antonio Álvarez, e o director da Axencia para a Modernización Tecnolóxica de Galicia (AMTEGA), Damián Rey, asinaron na mañá deste martes 27 de xaneiro un convenio de colaboración que permitirá avanzar ao ente público dependente da Consellería do Mar no ámbito da Administración Electrónica, logo da recente adhesión ao sistema avanzado de tramitación e xestión da axencia.
Segundo explicaron, o acordo rexerá o traballo para desenvolver de cara á xestión do sistema portuario galego no eido das Tecnoloxías da Información e Comunicación (TIC), a innovación e o desenvolvemento tecnolóxico.
Neste escenario de traballo, Portos de Galicia financiará as actuacións previstas para a integración dos seus servizos tecnolóxicos na axencia, creada para a definición, desenvolvemento e execución dos instrumentos da Xunta de Galicia neste eido. Con este obxectivo o ente portuario investirá máis de 200.000 euros no ano 2026 en actuacións que abranguen a licitación da súa nova plataforma de dixitalización, os servidores e máquinas virtuais necesarios, e a ciberseguridade, entre outras acción.
Pola súa parte, AMTEGA prestará o servizo de asesoramento e apoio a Portos para estas accións. Así mesmo facilitará a infraestrutura base necesaria para a migración dos sistemas, ferramentas e aplicacións de Portos de Galicia á axencia. Con este acordo, a Xunta pretende avanzar na Administración Electrónica do sistema portuario e axilizar e facilitar aos usuarios dos portos a súa relación co ente público.
