Os dous novos axentes da Policía Local de Muros comezan o curso de formación na Academia Galega de Seguridade Pública.
Antes, pasaron un proceso selectivo no que participaron máis de 200 persoas e incorporaranse ao servizo en Muros tras esta formación obrigatoria.
O Concello de Muros remata desta forma un longo período de traballo e xestións, polas dificultades que teñen as administracións locais para incrementar as prazas de Policía Local.
“Custounos moito conseguir sacar adiante estas dúas prazas, foron moitos meses e moitas horas de traballo, con numerosas dificultades, polo que é unha gran satisfacción persoal que Muros conte con dous novos axentes”, asegura a alcaldesa de Muros, María Lago, que pon en valor “a colaboración entre a Alcaldía e a concelleira de Seguridade Cidadá, Sandra Maneiro, durante todo o proceso”.
A alcaldesa quixo agradecer o traballo do persoal municipal e a colaboración das entidades e administracións que fixeron posible realizar o proceso selectivo: o IES As Insuas e o IES Fontexería, por ceder o pavillón e material como as cadeiras; o Concello de Noia, “por poñer a nosa disposición a pista de atletismo”, e os membros do tribunal, “pola súa dilixencia e bo facer”.
