A Consellería do Mar, a través de Portos de Galicia, impulsou a reactivación da actividade no edificio da lonxa vella do porto de Ribeira que funcionará, segundo fixo saber a conselleira Marta Villaverde este mesmo xoves 8 de xaneiro en Santa Uxía, como nova nave de redes “a partir de agora”. A titular de Mar engadiu que o ente público outorgou recentemente unha concesión administrativa que permitirá o novo uso.
Villaverde, que estivo acompañada pola delegada territorial da Xunta na Coruña, Belén do Campo, e polo presidente de Portos de Galicia, José Antonio Álvarez, explicou que a concesión terá un prazo de vixencia de 5 anos con posibilidade de prórroga. “O título administrativo autoriza o desenvolvemento de actividade de nave de redes, pero tamén aula de formación náutico pesqueira”, sinalou, engadindo que Portos de Galicia “aplicará unha bonificación do 95% das taxas por ocupación do solo, tal como recolle a Lei de taxas portuarias no caso de edificios como lonxas ou naves de redes; e deste xeito incentívase a actividade profesional nun inmoble de 2.500 metros cadrados, que quedou en desuso logo do traslado da lonxa ao edificio actual, que contou cun investimento da Xunta de Galicia de preto de 15 millóns de euros”.
Durante a súa visita ao porto ribeirense, a conselleira do Mar lembrou que a nave de redes era unha aspiración histórica do sector no municipio. Co obxectivo de dar resposta a esta necesidade, a Xunta de Galicia acondicionou o edificio cun investimento de 40.000 euros. As obras executadas consistiron na reparación da cuberta, demolición dos muros interiores coa fin de habilitar unha superficie diáfana, e acondicionamento dos departamentos para almacenamento de pertreitos.
Na súa estadía en Ribeira a conselleira estivo acompañada pola alcaldesa María Sampedro e polo concelleiro de Mar, Fernando Abraldes.
