Coma marca a tradición de cada inicio de ano, a xuventude de Ribeira sacou as súas mellores galas para celebrar a primeira noite do ano. Poucos foron os que pasaron pola carpa de Bandaurrío sen a clásica camisa branca, estreada para a ocasión e acompañada do elixir nocturno que dita a costume.
As rúas arrecendían a destilados e ao fume das casas, mentres os farois iluminaban unha noite marcada polo orballo e unhas temperaturas frescas. O frío, porén, quedaba en segundo plano grazas ás bebidas e ao ambiente festivo.
Coa instalación da carpa e a actuación dun DJ, o Concello ofreceu unha alternativa ao tradicional wateque do Baiuca. A proposta, non obstante, xerou opinións diversas entre a mocidade, que sinalou que a música resultaba “demasiado comercial”.
A pesar diso, a noite transcorreu sen incidentes. A xuventude de instituto concentrouse nas beirarrúas de Bandaurrio, arroupada polos faladoiros, as ledicias da madrugada e a espera dos churros do amencer, pechando así unha celebración tranquila e sen sobresaltos. (Luís Pérez Crujeiras)
