O programa DP0030 da Deputación da Coruña, destinado ao financiamento das actividades que, en materia de calidade, competitividade, organización de eventos e iniciativas turísticas, realicen en 2026 os entes de xestión, asociacións, mancomunidades e consorcios de turismo, terá un orzamento de máis de 2,3 millóns de euros.
Entre o 22 de xaneiro e o 16 de febreiro estará aberto o prazo de presentación de solicitudes, que deberán tramitarse por vía telemática, a través da plataforma SUBTEL, accesíbel desde a sede electrónica da Deputación.
A Administración provincial convoca esta liña de subvencións como parte da súa política de apoio a entidades locais, supramunicipais, asociativas e mixtas para o fomento da creación de produtos turísticos, mellora da difusión e posicionamento turístico do territorio, fomento da profesionalización no sector e avances na calidade deste segmento de mercado, co financiamento de áreas coma a formación, o deseño de plans ou o desenvolvemento de actividades.
O vicepresidente e titular de Turismo, Xosé Regueira, destaca que as axudas “facilitarán a promoción dos oito xeodestinos da provincia cun turismo de calidade, sempre apostando pola colaboración público-privada e sectorial para contribuír á competitividade e á innovación”.
Amais, dixo, “queremos favorecer a implantación e desenvolvemento de proxectos europeos de economía azul para potenciar o turismo náutico sustentábel, nun litoral coma o da provincia da Coruña que conta con 956 quilómetros de cost”».
Alén disto, o programa permitirá, segundo Regueira, “seguir dándolle impulso á gastronomía como recurso turístico, organizando eventos diferenciadores e creando produtos innovadores, e atendendo sempre á sostibilidade ambiental e á xeración de emprego no rural”.
As bases da convocatoria está publicadas no BOP do 13 de xaneiro.
