A Asociación Boirense de Empresas (ABE) puxo este sábado 3 de xaneiro o broche final á súa campaña de Nadal cun sorteo presencial no Polideportivo da Cachada, nun acto que reuniu a miles de persoas e que confirmou, unha vez máis, a forte implicación da veciñanza co comercio local de Boiro.
O evento, presentado pola actriz boirense e gañadora do Premio María Casares, Marta Ríos, e amenizado pola música de DJ Moe, desenvolveuse nun ambiente festivo, familiar e participativo, converténdose no colofón perfecto a varias semanas de intensa actividade de dinamización comercial
Antes do sorteo principal, tivo lugar a apertura da caixa do correo dos Reis Magos, unha das accións máis emotivas da campaña, na que se premiaron tres cartas con 100 euros en Bonos ABE cada unha, destinados á celebración do aniversario dos nenos e nenas premiados, Nahia, Elsa e Mia.
A continuación celebrouse o sorteo principal dos 3.000 euros en Bonos ABE, repartidos en tres premios de 1.000 euros que se poderán usar sen caducidade nin limitacións nos 211 negocios asociados, extraídos un a un entre as rifas validadas ao longo da campaña.
As persoas premiadas foron:
1º premio (1.000 €): Rafael Carreira
2º premio (1.000 €): Paula Alonso
3º premio (1.000 €): Balbina Dosil
Os premios foron entregados polo secretario da ABE, Santiago Cajaraville polo concelleiro de Comercio, Roberto Lojo e polo presidente da ABE, Daniel García , respectivamente, culminando o acto cunha foto final de familia no escenario.
Durante a súa intervención, o presidente da Asociación Boirense de Empresas, Daniel García, que apareceu no escenario vestido de “paxe real do comercio local” quixo poñer en valor “o enorme esforzo realizado polos negocios locais e pola propia ABE para ofrecer unha campaña ambiciosa, atractiva e pensada para as familias”. Segundo destacou, o sorteo é só a parte máis visíbel dun traballo que leva semanas detrás, co obxectivo de xerar movemento, consumo responsábel e vida nas rúas de Boiro.
Daniel García subliñou tamén o éxito da primeira edición do Parque de Nadal da ABE, que ao longo das festas recibiu a miles de visitantes, converténdose nun espazo de encontro para as familias e nun importante foco de atracción de público para o comercio e a hostalería local. “A acollida superou todas as expectativas e demostra que cando se aposta por iniciativas de promoción comercial pensadas para as familias, Boiro responde”, sinalou.
Desde a ABE quixeron agradecer expresamente “a confianza dos clientes, a implicación dos 211 negocios asociados e a colaboración do Concello de Boiro, da Deputación da Coruña e da Xunta de Galicia”, destacando que este traballo conxunto é clave para seguir impulsando campañas que reforcen o tecido empresarial local.
Con este sorteo e co balance moi positivo do Parque de Nadal, a Asociación Boirense de Empresas pecha “unha campaña de Nadal histórica”, consolidando o seu papel “como axente activo na dinamización económica e social de Boiro”, explicaron dende a patronal.
