O conselleiro de Presidencia, Xustiza e Deportes, Diego Calvo, reuniuse esta mañá co alcalde de Lousame, Esteban Ares, nun encontro no que tamén participaron o secretario xeral para o Deporte, José Ramón Lete Lasa, e a concelleira de Servizos Sociais, Silvia Agrafojo. A reunión permitiu abordar as principais necesidades do municipio e estudar posibles liñas de colaboración no marco do compromiso da Xunta co fortalecemento das entidades locais.
Durante a xuntanza, o alcalde de Lousame agradeceu a disposición do conselleiro a analizar a posibilidade de colaborar no financiamento da renovación do céspede do campo de fútbol municipal de Cabanetán, en Lesende. “Teño que agradecer que o conselleiro se comprometese a estudar a posibilidade de colaborar no financiamento da renovación do céspede do campo de fútbol municipal de Cabanetán, así como noutros proxectos que temos pensado para o municipio e que agardamos que se poidan poñer en marcha nos próximos meses”, indicou Esteban Ares.
A renovación do céspede suporá un investimento total de 204.781 euros, dos que o 80% será subvencionado a través dunha nominativa concedida pola Deputación da Coruña. Os 40.953 euros restantes serán achegados polo Concello de Lousame, que confía en completar esta achega grazas a unha aportación da Xunta de Galicia.
O alcalde aproveitou tamén o encontro para agradecer a colaboración do departamento que dirixe Diego Calvo noutros proxectos xa executados no municipio, como a construción dos novos vestiarios do campo municipal de fútbol da Silva, unha actuación cun investimento superior aos 340.000 euros e financiada en parte pola Consellería de Presidencia, Xustiza e Deportes.
