Xornada a deste venres 19, San Dario e San Atanasio, de transición marcada por un ambiente húmido debido á persistencia da circulación do norte. Os ceos permanecerán maioritariamente nubrados en boa parte de Galicia aínda que na costa se agardan períodos con menor presenza de nubes.
Segundo as previsións meteorolóxicas, os chuvascos serán en xeral febles e concentraranse principalmente no norte e interior do territorio. Nas zonas de montaña, as precipitacións poderán ser en forma de neve a partir dos 1.000 metros durante a mañá, elevándose a cota ata arredor dos 1.200 metros co avance da tarde.
As temperaturas experimentarán un descenso entre lixeiro e moderado, un cambio que se notará especialmente nos valores mínimos, contribuíndo a unha sensación térmica máis fría ao inicio da xornada. (5 graos de mínima e 12 de máxima).
En canto ao vento, soprará de compoñente norte frouxo en xeral, aínda que poderá acadar intensidade moderada no litoral atlántico. De cara á noite, espérase que role a compoñente sur, anunciando un cambio progresivo na situación meteorolóxica.
O noso mar: Vento do norte á mañá e á tarde e do sudoeste á noite, forza 3 a 5 á mañá, 2 a 4 á tarde e 2 a 3 á noite. Marusía á mañá e á tarde e mar ovellado á noite. Visibilidade boa. Mar de fondo do noroeste, con ondas de 4 a 5 metros.
