Galicia estará este venres 12, Nosa Señora de Guadalupe, baixo a influencia dunha fronte estacionaria que traerá consigo unha xornada marcada polas precipitacións e un ambiente máis frío.
Agárdanse chuvias de intensidade moderada en boa parte da Comunidade. Na metade oeste, as precipitacións irán remitindo co paso das horas, permitindo incluso a apertura de claros ao longo da tarde. Pola contra, na metade leste as chuvias serán máis persistentes, manténdose durante boa parte do día.
Nos cumios máis altos, as precipitacións serán en forma de neve, deixando unha paisaxe invernal nas zonas de maior altitude.
No relativo ás temperaturas, as mínimas mantéñense sen cambios, mentres que as máximas sufrirán un lixeiro descenso, contribuíndo a unha sensación térmica máis fría.
Os ventos soprarán de norte-nordés, moderados no litoral e frouxos no interior, reforzando a chegada de aire máis frío desde o norte.
O noso mar; Vento do nordés á mañá e á noite e do nordés á tarde, forza 3 a 5 á mañá e 4 a 6 á tarde e á noite. Marusía á mañá e forte marusía á tarde e á noite. Visibilidade mala á mañá, regular á tarde e boa á noite. Mar de fondo do noroeste, con ondas de 4 a 5 metros á mañá, 2 a 3 metros á tarde e 3.5 a 4.5 metros á noite.
