O Concello de Rianxo logrou un acordo histórico con Portos de Galicia (Consellería de Mar) para a cesión gratuíta á Administración local da parcela situada a carón do Auditorio de Rianxo. Nas vindeiras semanas formalizarase oficialmente a cesión coa sinatura dun convenio de colaboración en virtude do cal o Concello disporá dun soar de aproximadamente 6.000 metros cadrados.
“Trala sinatura do dito convenio poderemos dotar a parcela dos servizos e infraestruturas necesarios para o seu uso por parte dos veciños e veciñas”, informou o alcalde, Julián Bustelo, engadindo que esta cesión “supón un paso previo necesario de cara a comezar a desbloquear outros proxectos estratéxicos como a recuperación e renaturalización da fachada marítima rianxeira”. O Concello agradeceu á conselleira do Mar, Marta Villaverde, e ao Grupo Municipal do Partido Popular de Rianxo polo seu apoio e por traballar da man do Goberno “para acadar este importante logro”.
O rexedor engadiu que tralo acordo acadado con Portos de Galicia “a nosa zona portuaria cambiará de xeito notábel”. Tamén, indicou, grazas á mellora e ampliación das instalacións do Club Náutico de Rianxo, que dotarán á infraestrutura de 174 prazas de amarre. Ademais, instalaranse catro módulos de edificación prefabricados que albergarán unha cafetería e local social, oficinas, vestiario e o pañol para vela lixeira.
