O Concello de Rianxo, a través do seu alcalde Julián Bustelo, quixo rematar o ano facendo balance da súa actividade municipal en 2025, un ano que segundo salientou o rexedor, veu cargado de proxectos moi relevantes para o concello que non só confirman o compromiso do Goberno local coa cidadanía da vila rianxeira e das parroquias, senón tamén a recuperación económica e demográfica do municipio. No balance, reflectido polo propio alcalde nas redes, faise saber que o Concello rematou 2025 con máis de un millón e medio de obras licitadas e executadas.
Trátase, recordou, “dun importante esforzo investidor que se suma ao do ano previo e que nos sitúa, nesta altura da lexislatura, por encima dos 3 millóns de euros en obras licitadas e executadas”.
O alcalde Julián Bustelo enumerou algúns dos proxectos xa executados ou iniciados este ano e que estarán en execución nas próximas semanas:
-Ampliación de redes de saneamento e abastecemento en Meiquiz e Or (Leiro) – 208.785,50€.
-Renovación completa do firme da vía de acceso ao Montiño dende a DP-7203 (Taragoña) – 102.952,85 €.
-Proxecto de ampliación da rede municipal de abastecemento de auga entre os núcleos de Corques e Outeiro (Taragoña) – 90.713,70€.
-Segunda fase do proxecto para a dotación de redes de abastecemento e saneamento en Vilas (Asados) – 194.386,50€.
-Ampliación das redes de abastecemento e saneamento no núcleos de Villanustre (Asados) – 194.386,50€.
-Mellora do sistema de iluminación do parque empresarial de Rianxo – 39.862,40€.
-Renovación do sistema de iluminación e mellora enerxética do campo de fútbol municipal da Lomba (Taragoña) – 59.971,84€.
-Proxecto para reducir o consumo enerxético no edificio dos Servizos Sociais – 66.235,40€.
-Renovación de instalación e mellora da accesibilidade no Cuartel Vello de Rianxo – 48.236,65€.
-300.000€ en asfaltado de diferentes vías municipais en varios núcleos.
-Ampliación da rede municipal de saneamento en Tronco (Rianxo) – 208.785,50 euros.
-Proxecto técnico para a construción do centro de día nas dependencias do Pazo de Rianxiño – 172.788 euros.
Ademais, a estes proxecto sumaráselles axiña o cambio da totalidade das luminarias do paseo marítimo, unha obra que conta cun orzamento de 80.000€, así como o proxecto para a mellora da iluminación no conxunto da vila, unha actuación que conta cun orzamento de 547.364,30€.
