O Concello de Muros celebra o sábado 20 de decembro a súa II Gala do Deporte no Auditorio do Centro Cultural e Xuvenil (18:00 horas).
Será de novo un recoñecemento colectivo para o traballo que realizan a diario os clubs e deportistas de Muros, “unha gala á que convidamos a toda a veciñanza”, informou o Goberno local, que xa abriu o pasado xoves 4 a votación popular a través da web municipal (muros.gal) para o premio Especial da Veciñanza.
“Quedan aínda uns días pero a xente está desexando que chegue a gala tras o éxito da celebrada o ano pasado. Hai moitas persoas e entidades vencelladas ao deporte que merecen un recoñecemento”, comentou a alcaldesa, María Lago.
O concelleiro de Deportes, Damián Torea, destacou tamén “a gran receptividade que tivo de novo a gala entre o deporte local”. “O acto do día 20 será unha festa chea de momentos emotivos e sorpresas”, engadiu.
Entregaranse tres tipos de galardóns diferenciados: premios deportivos anuais, recoñecementos aos méritos conseguidos e mencións especiais.
