Activada para este martes a alerta laranxa por temporal costeiro no litoral galego
Galicia vivirá este martes 2, unha xornada marcada pola forte inestabilidade atmosférica, consecuencia da chegada dunha circulación do noroeste que arrastrará aire frío desde latitudes superiores. Esta situación deixará chuvascos xeneralizados ao longo de todo o día, algúns deles acompañados de treboada e saraiba, especialmente nas áreas máis expostas ao vento.
A cota de neve situarase entre os 900 e os 1000 metros, polo que as precipitacións poderán ser en forma de neve nas zonas de montaña.
No tocante ás temperaturas, as mínimas subirán lixeiramente, mentres que as máximas descenderán de maneira moderada debido ao aire frío en altura.(5 a 12 graos).
Os ventos soprarán do oeste-noroeste, con intensidade moderada no interior e forte no litoral, onde se poden rexistrar refachos significativos.
O noso mar: Vento do oeste á mañá, do noroeste á tarde e do noroeste á noite, forza 4 a 6 á mañá e á noite e 5 a 7 á tarde. Forte marusía. Visibilidade regular. Mar de fondo do noroeste, con ondas de 4.5 a 5 metros á mañá e 5 a 5.5 metros á tarde e á noite.
