Suspéndese a actividade deportiva do programa Xogade e federada no mar nos concellos afectados
A Xunta activa para mañá a alerta laranxa por temporal costeiro no litoral galego. Co fin de garantir a seguridade dos bens e as persoas, a Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde primeiras horas de mañá no noroeste e oeste da provincia da Coruña, ampliándose a media mañá ao suroeste da costa coruñesa e aos litorais de Pontevedra e Lugo. Agárdase mar combinada do noroeste con ondas de ata seis metros.
Para a xornada do martes, a Secretaría Xeral para o Deporte da Consellería de Presidencia, Xustiza e Deportes anunciou suspensións de actividade deportiva Xogade e federada no mar en catro zonas diferentes pola alerta laranxa por costeiros. Nos concellos do oeste da Coruña (Costa da Morte) entre as 03,00 horas do martes e as 15,00 horas do mércores. Nos concellos do noroeste da Coruña entre as 06,00 horas do martes e as 15,00 horas do mércores. Nos concellos do suroeste da Coruña e Rías Baixas entre as 12,00 horas do martes e as 09,00 horas do mércores. E nos concellos da Mariña Lucense entre as 12,00 horas do martes e as 12,00 horas do mércores.
Cómpre lembrar que, segundo as previsións dos órganos preditores a actividade deportiva Xogade e federada está tamén suspendida hoxe nos concellos do litoral da Costa da Morte, entre as 12,00 e as 18,00 horas.
A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
